Monday, July 3, 2017

කොහොඹා කංකාරියේ උපත සමග ලංකාවේ සංචාරේ

                                   කුවේණිගේ උපකාරයෙන් යක්ෂයින් මරා ලංකාවේ බලය ලබාගත් විජය කුමරුට චාරිත්‍රානුකූල රාජාභිෂේක මංගල්‍යයක් පැවැත්වීමට අවශ්‍ය විය .මේ සඳහා මදුරාපුරයේ පඬි රජුගේ දියනිය කැඳවා ගත්තේ සම කුල කුමාරිකාවක් හා විවාහය අභිෂේකයට  අවශ්‍යවීම නිසාය .ඒවන විටත්  කුවේණිය සමග විවාහයෙන් ජීවහත්ත හා විසාලා නම් දරුවන් දෙදෙනෙකුත් සිටියත් ඔවුන් මාලිගාවෙන් පලවාහරින්නේ මොනවා කළත් මිනිසුන් යක්ෂයන්ට බය වග පවසමිනි .තම නෑදෑයන්ට විනකර එක්වූ සැමියාත්  තමන්ව ප්‍රතික්ෂේප කිරීමෙන් අසරණවූ කුවේණිය විජය රජුට හා හෙළ දිවයිනට ශාප කළාය .මෙම ශාපය සිදුකළ ස්ථානය වර්ථමාන යක්දෙස්සාගල කන්ද ලෙස සැලකේ.

 යක්දෙස්සාගල කන්ද
                                  මෙම ශාපය නිසා රාජ්‍යත්වයට  තම ලෙයින් දරුවෙක් බිහිකිරීමට නොහැකි වූ විජය රජු තමාගේ ඇවෑමෙන් රාජ්‍ය බාරගැනීමට තම සොයුරු සුමිත්තට ආරාධනා කළත් ඒවන විට ඔහුට සිංහපුර රාජ්‍යත්වය හිමිව තිබුණු නිසා ඔහුගේ බාල පුතා වූ පඬුවස්දෙව් කුමරු ලංකාවට පිටත්කර එවන ලදී.පඬුවස්දෙව් කුමරු ලංකාවට පැමිණියේ විජය රජුගේ අභාවයෙන් වසරක් ගතවූ පසුවයි.ඒවන විට උපතිස්ස ගාමයේ  සිටි අමාත්‍යවරුන් ගෙන් පාලනය බාරගෙන පඬුවස්දෙව් කුමරු රාජ්‍යත්වයට පත්විය .

                        ලක්දිව කිරුළත් සමගම පඬුවස්දෙව් රජුට කුවේණිගේ ශාපයත් උරුම විය.උපුල්වන් දෙවියන්ගේ ආශිර්වාදය ලැබුණු විජයට කුවේණිගේ ශාපය එතරම් දරුණුවට බලනොපෑවත් පඬුවස්දෙව් රජුට රාත්‍රියේ නිදාගැනීමටවත් නොහැකි ලෙස ශාපය බලපාන ලදී.සිහිනෙන්  බිහිසුණු දිවියෙකුගේ රුවක් පෙනෙන්නට වීමෙන් රජු රෝගාතුර විය .රෝගාතුර වූ රජු සුවපත් කරන ලෙසට රජතුමාගේ ඉෂ්ඨ දේවතාවා ශක්‍ර දෙවියන් ගෙන් ඉල්ලා සිටින ලදී.මේ ඉල්ලීමට ඇහුම්කන්දුන් ශක්‍ර දෙවියන් පවසා සිටියේ දිවි දෝෂය නිමකරන්නට මලෙන් උපන් කුමාරයෙක් විසින් යාගයක් සිදු කළයුතු බවයි.ඒ සඳහා මලය රටේ රජු වූ මලින් උපන් මලය රජු කැඳවා ගතයුතු විය.ශක්‍ර දෙවියන් මලය රජතුමා ශ්‍රී ලංකාවට කැඳවාගෙන ඒම රාහු අසුරයාට පවරන ලදී.
                               යාගයක් පැවැත්වීමට රජෙක් සියළු වැඩ පසෙකලා පැමිණෙතැයි බලාපොරොත්තු විය නොහැකි නිසා ඒ සඳහා උපායක් යෙදීමට රාහු අසුරයා තීරණය කළේය .රාහු අසුරයා ඌරු වෙසක් මවාගෙන මලය රජුගේ රාජකීය උද්‍යානය විනාශ කරන ලදී ,කෝපයට පත් රජු මේ පිලිබඳ සොයාබැලීමට පැමිණෙත්ම ඌරු වෙසින් සිටි අසුරයා රජුගේ  හිසට උඩින් පැන ලංකාවට දිවයන්නට විය. තමාට සිදුකළ අපහාසය නිසා කෙසේහෝ ඌරා දඩයම් කිරීමේ අරමුණින් මලය රජු තම සොහොයුරන් දෙදෙනා සමග  ඌරා ලුහුබඳිමින් ලංකාවටම පැමිණියේය .හන්තාන අඩවියේදී මලය රජු කඩු පහරක් එල්ල කරත්ම ඌරා ගලක් බවට පත්විය .(මෙම ගල හන්තාන කඳු වැටියේ ඇති ඌරා කෙටූ ගල බව විශ්වාස කෙරේ.)
                                     
හන්තාන කඳුවැටිය දකුණු අන්තයේ සිට.
                       
හන්තාන කඳුවැටිය දිවිදොස් කන්දේ සිට.(මහවැලි ගඟ අසල ඇත්තේ ප්‍රිම් රෝස් කන්දයි )
                             
                                        එවිට රජු ඉදිරියට පැමිණි ශක්‍ර දෙවියන්  මලය රජු ලංකාවට කැඳවාගෙන ඒමට හේතුව පවසන ලදී.පඬුවස්දෙව් රජු සුවපත් කිරීමට අවශ්‍ය යාගය පැවැත්වීමට මුලින්ම යෝජනා වූයේ දිවිදොස් කන්ද පාමුලදීය නමුත්   එහි ඉඩකඩ මදි බැවිනි යාගය පැවැත්වූයේ අනුරාධපුර මහමෙව්නා උයනේදීය.
                             
මහමෙව්නා උයනේ සමාධි බුදු පිළිමය
                             පඬුවස්දෙව් රජුගේ දිවි දෝෂය එයින්  සුවපත් වූ පසු මලය රජු නැවතත් සිය රටට යෑමට පෙර නැවතත් එම යාගය පැවැත්වීමට අවශ්‍ය දේ යාගය පැවැත්වීමට උපකාරී වූ කොහොඹා යකාට උගන්වා තම ඔටුන්නත් ඔහුට ලබාදී ඇත.(මේ නිසා මෙය කොහොඹා කංකාරිය නම්වන බව පැවසේ.)මලය රජුගේ ඇඳුම් කට්ටලය වර්ථමාන උඩරට වෙස් ඇඳුමට පාදක වූ බවට මතයක්  ජනප්‍රවාදයේ පවතී.

කොහොඹා කංකාරියේ අවස්ථාවක්.(ඡායා රූපය අන්තර්ජාලයෙනි )

 (කුවේණියගේ ශාපය ,කොහොඹා කංකාරියේ ආරම්භය පිලිබඳ මෙයට වෙනස් ජනප්‍රවාද රැසක් ඇති අතර ඔබ දන්නා විස්තර මෙයට කමෙන්ට් ලෙසින් එක්කරන්න)        
       
                                        මෙම ලිපිය ලිවීමට මූලික වූයේ දිවිදොස් කන්දට එම නම ලැබුණු කතාව සොයාගැනීමට කළ උත්සහයයි.මීට කලකට පෙර  අසා තිබුණු එම කතාව සොයාගැනීමට නොහැකි වුවත් ඊට පාදක වූ දිවිදෝෂයේ කතාව ලියා තැබුවේ ඉදිරියට මේ කතාවට සම්බන්ධ යක්දෙස්සාගල කන්ද ,හන්තාන කඳුවැටිය ,දිවිදොස් කන්ද සහ මහමෙව්නා උයනට මා කළ සංචාර පිලිබඳ සටහන්වලට ආරම්භයක් ලෙසයි.

21 comments:

  1. කුවේණියගේ ශාපය ,කොහොඹා කංකාරියේ ආරම්භය වගේ එව්වා මිත්‍යා දෘෂ්ටික වැදගම්මකට නැති පල් හෑලි. ඕවා ගැන කතා කරන වෙලේ විද්‍යාත්මක දැනුම බෙදාහදා ගනිමු.

    ReplyDelete
    Replies
    1. ප්‍රතිචාරයට ස්තූතියි .මම මේ ජනප්‍රවාදය ලියන්න හේතුව ලිපියේ අවසානයේ සටහන් කරලා තියනවා.

      Delete
  2. මේ ලෝකයේ බොහෝ සුන්දර දේ ගතහොත් ඒවා විද්යාත්මක නැහැ. ඉන් අදහස් කරන්නේ සියළු මිත්යා දෘෂ්ඨික දේ සුන්දරයි කියන් එකනම් නොවේ. සඳ තවත් පස්ගොඩක් ; යෝධ සවලකට ගත හැකි කියනවට වඩා ; සේකර හඳ සහ නිව්යෝර්ක් නුවර කවියේ දැක්වෙන පරිදි මේ අපේ වෙල් එළියට පායන හඳ! බෝමළුවට පායන හඳ ලෙස ගත්තාම ඒකෙ සුන්දරත්වයක් රැඳෙනවා. මේ කොහොඹා කකකාරිය , දෙවොල් මඩු , වේල් කරත්ත , කැරොල් සංගීතය , භක්ති ගීත , නාද්ස්වරම් හඬ , තවිල් බෙරේ මේ සියල්ල එක්කරන්නේ ජීවිතයට සුන්දරත්වය! එය විද්යාවෙන් ඈතයි. එකඟයි! හැබැයි හදවතට ලඟයි! -හොඳ ලිපියක් - තට්ටයා http://thattayagekolama.blogspot.com/

    ReplyDelete
    Replies
    1. ඔබේ අදහස ගොඩක් වටිනවා.ඇත්තටම ඕන දෙයක් රසවිඳින්න තමන්ගේ මනස පුරුදු කරගන්න පුළුවන්නම් ජීවිතේම සුන්දරයි.

      Delete
  3. ඇත්ත බොරු කොහොම වෙතත් හොඳ කතාවක්.

    ReplyDelete
    Replies
    1. මේක එක එක විදිහට සඳහන්වෙන කතාවක්.ඇත්ත බොරු කෙසේවෙතත් රසවිඳින්න පුළුවන්.

      Delete
  4. රජුගේ දිවිදෝශය නැති කරන්න කොහෝඹාකංකාරිය පටන්ගත්තා කියලා ඔය විස්තර ටිකක් විතර දැන හිටියාට ස්ථාන එක්කම දැනගත්තේ අදයි. ස්තූතියි

    ReplyDelete
    Replies
    1. මේක ලියන්න හිතුවෙ මීට සම්බන්ධ තැන්වලදී අහන්න ලැබුණු කතා එකතු කරල තියන්න.

      Delete
  5. මේ කතාවේ මංනොදන්න බොහෝ දේ අද දැන ගත්තා....

    ReplyDelete
    Replies
    1. මේ සටහන් කාටහරි වැදගත් කියල දැනගන්න එක ලොකු සතුටක්.

      Delete
  6. හොඳ ලිපියක් බක්කරේ. ඉදිරියේදී මේ පිළිබඳව වැඩිදෙයක් කියවන්නට බලන් ඉන්නවා.

    ජයවේවා!!!

    ReplyDelete
    Replies
    1. ඉදිරියට ලියන්න බලාපොරොත්තු වෙන්නෙ මේ කතාවට සම්බන්ධ තැන්වලට ගිය සංචාරක සටහන් .

      ජයවේවා!!

      Delete
  7. බුදු අම්මෝ විස්වාස කරන්න බැරි කතා ගොඩායි.මම බලන් ඉන්නේ පින්තූර දානකම් ඔය ගිය ගමන් වල

    ReplyDelete
    Replies
    1. ගියපු ගමන් විස්තර එක්ක පින්තූර දාන්නම් .මේකත් එක්ක බැඳුණු තවත් කතා සෑහෙන්න තියනවා.

      Delete
  8. අදයි මේ පැත්තෙ ආවේ...
    දිවි දෝශය ගැන අහල තිබුන... ඒත් ගොඩක් විස්තර දැනගත්තෙ බක්කරගේ සටහනින්...
    දිගටම ලියන්න...

    ReplyDelete
    Replies
    1. ස්තූතියි ප්‍රතිචාරයට.දිගටම මේ පැත්තට එන්න.

      Delete
  9. නොදන්න තොරතුරු ටිකක් බක්කරේ

    ReplyDelete
    Replies
    1. ස්තූතියි ප්‍රතිචාරයට රෝමා.

      Delete
  10. සිතුවිලි සටහන් බ්ලොග් කියවනය - http://sithuwilisatahan.com/

    පොඩි ස්පෑම් පාරක් බ්ලොග් ලියන අය දැනුවත් කරන්න දැම්මේ අවුලක් නැහැනේ

    ReplyDelete